Jazz e vin, il teritori in musiche

Nubya Garcia, James Brandon Lewis, William Parker, Calibro 35, The Necks: al è dome cualchi protagonist de vincjesime otave edizion di di “Jazz & Wine of Peace”, il festival internazionâl che dai 23 ai 26 di Otubar al mudarà Cormons e il Cuei jenfri Friûl e Slovenie intun grant palc di musiche e culture. Ideât e inmaneât dal circul Controtempo, al instrece come simpri il jazz contemporani e lis ecelencis enogastronomichis dal teritori, riclamant public de Italie e de Europe centrâl. IN cuatri dîs a son in program 29 events in 4 teatris (Cormons, Gurize, Gnove Gurize, Gardiscje) e 21 cantinis, dimoris storichis e altri lûcs dal teritori. Il prin cartelon firmât dal gnûf diretôr artistic Enrico Bettinello al previôt ancje un “Premi Bardusco” in memorie dal storic fondadôr de rassegne, muart l’an passât. dongje dal program principâl, lis cercis in musiche di Jazz & Taste, i laboratoris, une mostre fotografiche, un podcast e une anteprime za ai 2’0 di Otubar cu la Zerorchestra. (A.I.) – 03.10.2025