Un dai musiciscj e compositôrs plui prestigjôs nassûts a Udin, ancje se di agnorums aromai al è citadin american e al è a stâ di chê altre part dal ocean, a Los Angeles, al à vût il sigjîl de citât. Il percussionist, produtôr e artist multimediâl Andrea Centazzo (nassût achì intal 1948) al è stât e al è ancjemò une des fondis de musiche di improvisazion in Italie e intal mont, autôr di centenârs di composizions e desenis di album, creadôr di une cjase discografiche storiche inte suaze de musiche jazz e de avanvuardie. Il ricognossiment al è stât consegnât dal sindic Alberto Felice De Toni compagnât dal assessôr ae Culture Federico Pirone e dal assessôr al Turisim Alessandro Venanzi. Vinars ai 17 Centazzo al sarà li dal Visionario par presentâ il gnûf spetacul multimediâl “Animae Mundi”, dopo vê regjistrât il so gnûf album li dai studis Artesuono di Dedeà. (A.I.) – 14.11.2023
79
