Il jazz sul flum al tache di Polcenic

da Andrea Ioime

Compagn di ogni flum, che al ven fûr di une risultive e al va daûr dal so cors, ancje la rassegne “Jazz River”, il flum dal jazz, al va indevant, mudant la aghe dal Livence intal fîl di une manifestazion simpri plui buine di meti in relazion musiche, paisaç, storie e comunitât. Rivade ae seste edizion inmaneade dal circul Controtempo in colaborazion cul comun di Polcenic, pe prime volte la rassegne e va dal paîs des aghis fint a Sacîl e Brugnere cun siet zornadis di events, no dome musiche dal vîf. In program artiscj talians e internazionâi che a doprin il jazz tant che un lengaç viert, contemporani e in evoluzion. Si tache vinars ai 11 cul cuartet dal baterist Roberto Gatto 4tet che al conte i 100 agns di Miles Davis cul spetacul “Around Miles”. Il dì dopo, simpri tal teatri di Polcenic, il tercet di une des ghitaristis plui impuartantis de sene internazionâl, Eleonora Strino cun Giulio Corini e Zeno De Rossi. Domenie ai 13 a Sacîl al rive l’innomenât Raphael Gualazzi di bessôl ,dome piano e vôs, intant che ai 16 te vile Varda di Brugnere il protagonist al sarà invezit Thomas Umbaca. Sabide ai 19 a Polcenic l’ultin conciert cul duet Gianluca Petrella e Pasquale Mirra. In program altris dôs zornadis: joibe ai 17, dentri di “pordenonelegge”, presentazion dal libri “Lucio c’è. La vita e la musica di Lucio Dalla” di Marcello Balestra, e domenie ai 27, fieste pe Zornade mondiâl dai flums cun musiche (Paolo Forte, Ankubu, Massimo Silverio) e cine (Paolo Antonio D’Andrea, Edoardo Magrini e Alessandro Fantuzzi). (A.I.) – 10.09.2026

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Progjet finanziât de ARLeF
Agjenzie Regjonâl pe Lenghe Furlane

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui