Il festival jazz di Cormons al è tornât ai numars di prime dal Covid

Si è sierade cul conciert di Paolo Fresu e Omar Sosa e cuntun belanç che al entusiasme la vincjesime seste edizion dal festival transfrontalîr “Jazz & Wine of Peace”, inmaneât dal circul Controtempo di Cormons cu la direzion artistiche di Mauro Bardusco. Un sucès no dome pe cualitât de musiche e pai 17 concierts ducj plens su 19, ma apont pe presince dal public, che al à passât i numars dal periodi prime dal Covid cun passe 6 mil presincis, plui dal 50 par cent dal forest, in maiorance de Austrie, dongje di apassionâts rivâts di Slovenie, Cravuazie, Gjermanie e di altris Paîs nordeuropeans. No mancul plens i ambients di Cormons, centri de manifestazion, che a àn dât acet a public e musiciscj, cun tante sodisfazion pal indot di bande des struturis ricetivis dal teritori: albiercs, bed&breakfast e agriturisims. (A.I.) – 30.10.2023