“Folkest” al tache a jentrâ tal teritori

Daspò des anteprimis, la rassegne “Folkest” a tache sul teritori cuntune schirie di apontaments che a lassin spazi ae discuvierte, al incuintri e ae valorizazion di cetancj lûcs dal Friûl doprant la musiche, intun viaç di suns che al conte la identitât, lis storiis e lis tradizions. Il leam cul teritori al è di agnorums une part impuartant dal progjet artistic di Folkest, che al vûl puartâ la musiche in lûcs pôc cognossûts. Si tache joibe ai 12 a Glemone, tal parc di vie Dante, cu la Fieste balcaniche di Lydia Koycheva e Balkan Orkestra. Il dì dopo a Pordenon, “Irish folk night” cui Matching Ties e i Obrannlaig Rinceoir Dancers. Sabide ai 14 i apontaments a son trê: a Vît “Il vento delle Ande” cui argjentins Miguel Angel e Lautaro Acosta, a Cjampfuarmit une altre gnot irlandese e in place a Tumieç i Tazenda cuntune cerce dal conciert che a fasaran ai 27 di Jugn a Romans dal Lusinç. (A.I.) – 11.06.2025