Fieste de musiche par trê dîs a Palme

Di vinars ai 20 e fint a domenie ai 22 di Jugn, a Palme e torne la “Fieste de musiche”, rivade ae decime edizion. Une iniziative internazionâl nassude par celebrâ il valôr de musiche te sô massime libertât di espression, indreçade a ducj i gjenars di artiscj – amatoriâi o professioniscj – che a àn voie di ve un spazi par podê sunâ. La rassegne e je inmaneade dal Comun di Palme adun cu la academie musicâl “Città di Palmanova” e chest an e à in calendari ancje cualchi event speciâl, di “Palchi nei parchi” (Palcs tai parcs) ae “Gnot romantiche”. A saran passe trente i cjantants, musiciscj e grups che a fasaran i concierts in 16 lûcs diferents, ducj cence sore nuie, messedant classiche, corâl, musiche par bandis, cjantautôrs, jazz, pop, soul, blues, e cetancj altris gjenars. Un dai events al è il conciert al jevâ dal soreli, sabide ai 21 aes 5 di buinore sul bastion Garzoni, cui Green Waves che a saludaran l’Istât. (A.I.) – 19.06.2025