Cristicchi e Francesc, il Sant di ducj

Simone Cristicchi al torne te nestre regjon - daspò di vê presentât in anteprime “Magazzino 18”, e po dopo “Trieste 1954” e “Orcolat 76” - cul so musical “di bessôl”, ven a stâi “Franciscus, il folle che parlava agli uccelli”, “Francesc, il mat che al fevelà cui uciei”. Il spetacul, scrit dal stes Cristicchi cun Simona Orlandi, al sarà in sene martars ai 27 tal teatri “Verdi” di Manià, dulà che si è za jemplât dut. Po dopo al sarà rapresentât in altris doi teatris dal circuit dal ERT tal mês di Març,: ai 14 tal Teatri “Zancanaro” di Sacîl e ai 16 a Monfalcon. Joibe ai 29 invezit al sarà dentri de stagjon di prose dal Teatri gnûf “Giovanni da Udine”, firmade dal diretôr artistic Roberto Valerio. Fat di riflessions, domandis e cjançons origjinâls scritis di Cristicchi e de cjantante e autore Amara, il spetacul al esplore e al conte la storie dal “Sant di ducj”. Al centri e je la linie fine jenfri la matetât e la santitât, un teme centrâl inte vite personâl e spirituâl di Francesc, ma ancje la puaretât, la ricercje de gjonde perfete e la spiritualitât universâl. (A.I.) - 26.01.2026

Foto di E. Scremin