A Cinemazero la crisi climatiche de Afriche

Ae vilie de viertidure de Conference Onu pal clime di Dubai, miercus ai 29 a Pordenon, li di Cinemazero, e je previodude in anteprime nazionâl la proiezion dal documentari “Between the Rains” di Andrew H. Brown e Moses Thuranira. E sarà la ocasion par impiâ lis lûs su lis consecuencis dal riscjaldament globâl in cualchi Paîs de Afriche. L’avigniment al fâs part de decime setime edizion de rassegne di cine e culture “Gli occhi dell’Africa” (“I voi de Afriche”). Premiât ai festivai di Tribeca, Calgary e no dome, “Between the Rains” al conte la storie di un fantat dal Kenya, cui grancj secs leâts al cambiament climatic e il pericul di conflits tra popolazions dongje une di chê altre. (A.I.) – 28.11.2023