Laris in azion îr sot sere tra Buie e Colorêt di Montalban: a Buie trê malvivents, cu la muse taponade di un passemontagne a son jentrâts intune cjase daspò che lis telecjamaris di control ju vevin filmâts (lis imagjinis a son stadis publicadis sui Social)intant che si movevin tra lis abitazions di vie Codesio, Strambons e Sottocostoia. Doprant torcis a àn rivât a jentrâ dentri di une cjase par pôcs minûts par dopo scjampâ di corse, forsit metûts in fuide dai proprietaris e dai carabinîrs.
Vie pe gnot a son invezit jentrâts intune cjase di vie Codugnella a Colorêt di Montalban, indulà che i delincuents a àn puartât vie zoiis dopo ve sfuarçât la puarte dal ingrès.
Chescj fats a àn fat lâ sù il pinsîr tra i citadins pront a a segnalâ moviments stranis doprant propit i Social e ancje scrivint tai grups su Whatsapp.
Ce che al è sucedût inte zone culinâr al somee une vore di dongje ae robarie fate ai prin di Mai, vie pe gnot, cuant che trê malvivents a son jentrâts a Pavie intune cjase isolade e daspò ve sierât intune stanzie mari e fie, a àn cirût robe di valôr. Un mût simil di lavorâ al è stât doprât ancje tra Martignà e Murùs cuintri di feminis indenant cui agns, tant che plui di cualchidun al pense che a sedi simpri la stesse bande, ancje se par cumò no son confermis. (a.d.g.) – 04.05.2026
