Il slac su la strade dal pas di Mont Crôs al fasarà discuti ancjemò a lunc. La aministrazion di Paluce e volarès che i intervents a fossin svelts e par chest al veve domandât ae Regjon un incuintri par vuê, cun Anas, il Land carinzian e i distrets di Vilac e di Hermagor. “O sin preocupâts par une tempistiche che o varessin volût plui svelte – al fâs savê il sindic Luca Scrignaro – e chest no dome pai dams che la sierade dal Pas e compuarte ae economie locâl, ma ancje pal bon non de Italie, che in chest câs al è rimetût ae pronte restaurazion dal colegament stradâl internazionâl”.
La riunion e je saltade parcè che nissun rapresentant de Regjon al podeve partecipâ, par vie di malatiis e di impegns. La situazion e je stade confermade dal assessôr regjonâl aes Infrastruturis Cristina Amirante. “Magari cussì no il periodi al è plen di apontaments e i tecnics a son al lavôr sui impegns di spese de fin dal an. Jo stesse o soi cu la influence. L’incuintri al è stât domandât in timps tant strents, ma no je une prioritât. La Regjon e je daûr a spietâ la relazion detaiade dal gjeolic. Dibant fissâ incuintris prime – e ribat Amirante -, o vin di vê il cuadri detaiât. Il slac al è impuartant, lis galariis comprometudis. Par cumò no vin rispuestis”. (a.d.g.) – 19.12.2023
