Cuant che a àn tacât a rivâ carabinîrs e ambulancis, vuê di matine, i citadins dal Borc Taboga a Glemone no savevin ce pensâ. Cualchi ore e lis televisions a àn tacât a pandi la brute gnove che al jere stât copât un om, Alessandro Venier, 35 agns. Ce che dut câs la int no si spietave al jere che a vê copât l’om a sedin stadis sô mari Lorena (clamade Lena) e la femine convivente di 30 agns di origjins colombianis, che a vivevin ducj insiemi (e je ancje un piçule di 6 mês) inte cjase di proprietât di Lorena, in vie dei Lotti 47 che si cjate a pôc metris de strade Pontebane.
A clamâ il 112 tor des 10.30 a son stadis propit lis dôs feminis, ma cuant che a son rivâts i infermîrs a àn capît che nol jere nuie ce fâ. L’om al jere stât copât za di cualchi zornade e il so cuarp al jere stât fat a tocs e metût dentri di un bidon, dentri de cantine e parsore e jere stade butade cjalcine vive, forsit par morestâ l’odôr.
Lis dôs feminis a varessin za confessât l’omicidi, ancje parcè che cuant che a son rivâts i carabinîrs pes primis investigazions, la lôr atenzion e je stade indreçade propit su lis dôs feminis.
Cumò si trate di scuvierzi il movent dal omicidi, ma i vicins di cjase no podevin crodi a ce che al jere sucedût: Lorena che e lavore come infermiere tal ospedâl di Glemone e jere cognossude come une siore par ben che e veve patît tal passât l’abandon dal om cuant che pôc timp dopo al jere nassût il fi, tirât sù di bessole. Lorena si jere cjapade cure e e veve dât acet ae compagne dal fi cuant che e jere restade incinte, proviodint a mantignî ducj i trê ancje parcè che Alessandro nol veve un lavôr fis.
Lis dôs feminis a son stadis puartadis te caserme dai carabinîrs e arestadis, intant che la piçule e je stade afidade ai Servizis sociâi. Lis investigazions a son coordenadis de Procure de Republiche di Udin. (a.d.g.) – 31.07.2025
