Memorie e taramot: ce ereditât stino lassant ai zovins?

Vuê in Friûl il 49 par cent de int e à mancul di 50 agns. Ven a stâi che no à nissun ricuart dal taramot. Se o tignìn cont ancje di chei che tal 1976 a jerin ancjemò frutins, plui de metât di lôr (e dentri ancje tancj forescj vignûts a stâ culì) no àn un leam diret cun chel cjapitul de storie cussì impuartant pe nestre Patrie. Sierâts i fârs su la liturgjie dal aniversari, il risi al è che la memorie no rivedi in ereditât ai zovins, tant che ancje tes scuelis la storie di chenti no vignedi insegnade. E alore ducj nô o vin une responsabilitât gruesse: rivâ a contâ al 100 par cent dai furlans di doman  no dome la croniche de tragjedie e no dome il lustri de ricostruzion, ma ancje dut chel che la retoriche nus plate. Il nestri popul al à za pierdût i trens de vere memorie de Prime e de Seconde vuere mondiâl, scjafoiâts de retoriche taliane. Chel dal taramot al à di jessi dome nestri e o vin di savêlu vuidâ te ferade juste. Une responsabilitât che no je dome di politics, storics e gjornaliscj, ma ancje di ducj chei cuntun pêl grîs, che a cjase lôr a àn di contâ ai fîs e ai nevôts la lôr memorie, cussì che il fîl che al lee il nestri passât al nestri doman nol vignedi taiât. (R.C.) – 06.05.2026