Zornade pardabon grivie pai Vigjii dal fûc, agjents dal Cuarp forestâl regjonâl e pai volontaris de Protezion civîl che, sot di cjaldon african, a stan cirint di studâ i fûs impiâts sul Cjars, che a àn cjapade fuarce par vie di aiar e teren sec.
Di sabide ai 1 di Avost cetancj oms, cuasi un centenâr, a son impegnâts, ancje dulinvie de gnot, par cirî di limitâ i dams dal grant fûc impiât parsore Triest, tra Padriciano e Gropada. Lis operazions a son ladis indenant par dut il dî di vuê, doprant ancje doi elicotars de Protezion civîl regjonâl e chel dai Vigjii dal fûc rivât di Vignesie.
Come che nol fos avonde, si è impiât un altri fûc dilunc de strade che, inte frazion di Castel Rubbia a Savogne dal Lusinç e puarte bande S. Michêl dal Cjars, indulà che e je rivade une scuadre di pompîrs rivade di Gurize. In graciis dal intervent fat daurman, lis flamis a son stadis studadis prime che as cjapassin masse teren.
La situazion e je pardabon dificil e al covente fâ une vore di atenzion par no fâ impiâ fûcs e par segnalâ se si viôt cualchidun che al cîr di fâ dams. (a.d.g.) – 02-08-2026
