“La Regjon e da tresinte mil euro ai Comuns dal Friûl-Vignesie Julie che, adun cun associazions femininis e ents dal Tierç setôr, a realizaran pe Zornade internazionâl pe eliminazion de violence su lis feminis, iniziativis di prevenzion e contrast ae violence di gjenar, infuartiment des feminis e promozion des stessis pussibilitâts”.
Lu dîs l’assessôr regjonâl ae Famee Alessia Rosolen ae vilie de ricorence che si celebrarà doman ai 25 di Novembar.
“Ancje in Friûl-Vignesie Julie – e comente Rosolen – la violence su lis feminis e cres in maniere preocupante e continue. I progjets finanziâts chest an, plui di 60 su dut il teritori, a confermin l’impegn cjapât de Regjon pes politichis di paritât, prevenzion e contrast ae violence su lis feminis. La leç di suaze su la famee, che cun chê o vin fissât il principi di trasversalitât des politichis pe pâr oportunitât, e previôt l’infuartiment dal rûl strategjic dal sisteme di istruzion, formazion e lavôr inte promozion di une vere culture di avualance, par prevignî la violence cuintri lis feminis in dutis lis sôs formis”. (ADG) – 24.11.2022
