Il sindic di Monfalcon, Luca Fasan, al à presentât vuê la so gnove scuadre. Il so vice al sarà Luca Zorzenon, espression di Fratelli d’Italia, che al varà lis deleghis a Cumierç, artesanât e terziari. A tornin come assessôrs Antonio Garritani (esterni cun deleghis a Planificazion urbane, patrimoni e Afârs gjenerâi), Paolo Venni (Servizis tecnologjics, Belanç, Societâts partecipadis), Fabio Banello (Ativitâts sportivis) e Tiziana Maioretto, za assessore ae Educazion e Formazion, che e tignarà chestis deleghis cun di plui chê ai Lavôrs publics.
Gnove invezit (come chê di Zorzenon) la nomine di Marta Calligaris (Forza Italia) tant che assessore aes Politichis e Ativitâts sanitariis, ma al è propit su chest non che no ducj a son in acuardi. La sielte de Calligaris e je stade di fat criticade propit dal so partît che intune note al à fat savê che “L’unic non che o vevin fat al jere chel di Francesco Volante, cualsisei altre nomine no riflet la nestre volontât”.
Anna Maria Cisint e sarà Conseîr delegât su legalitât, Sigurece, lote cuintri dal degrât e de radicalizazion islamiche, Progjetazion europeane, economie dal mâr e supuart al sindic pes politichis dal personâl. Chei altris doi conseîrs delegâts a saran Riccardo Matteo (Lega, deleghe sui Zovins) e Giovanni Battaglia che al starà daûr ai rapuarts cui citadins. (a.d.g.) – 24.04.2025
