Doprâ il furlan nus rint plui inteligjents e plui unîts. E alore, parcè vino di pierdilu?
In dì di vuê, cuntune economie globâl e int che e rive di dut il mont, si pues crodi che la marilenghe no coventedi plui. Sino pardabon sigûrs?
Invezit, a son tancj i vantaçs par tignîle vive. Par cumò o contarai dome doi.
Il prin – e lu disin i miedis – al è che fevelâ plui lenghis, tacant de scune, al fâs cressi miôr il cerviel. In curte: si devente plui inteligjents. Nol impuarte ce lenghis, ma noaltris o vin in cjase il furlan e o podìn propit doprâ chel. Daspò al sarès ben zontâ altris lenghis, tacant dal inglês. Cussì, i fruts, tra famee e scuele, a puedin vê une valîs di cognossince e di neurons che ur pues dâ un sburt in plui in dute la lôr vite.
Vignìn al secont vantaç, che al cjape no la singule persone, ma la nestre comunitât furlane interie. Une cuistion une vore dibatude in dute Europe, e no dome, e je chê clamade “coesion sociâl”. Ven a stâi il leam che al à di vê une societât par sedi fuarte e vivarose, par mantignî e fâ cressi il bon stâ, la ricjece e i servizis. Chest leam al è fondât su valôrs che ducj a ricognossin. Valôrs che a vegnin pandûts ancje traviers di une lenghe, come che al è il furlan.
No lu crodêso? Dispès o fâs chest esempli. Cemût si voltie la peraule “lavôr” par napoletan (che al è un dialet)?
La rispueste e je “faticà”.
E cumò ce pensaiso dal leam tra valôrs e lenghe?
Tal ultin. A colin in fal chei che a difindin la nestre lenghe cjalant dome par daûr, ingrumant une difese che e poie dome sul fat che al è stât simpri cussì. La nestre lenghe si rive a difindi dome se si cjale indenant, se e pues fânus vivi miôr doman. E il furlan, come che o vin dit, al pues.
Rossano Cattivello
