Premi in Spagne pal espert udinês di cine western

Il studiôs e storic dal cine Carlo Gaberscek, udinês, otante agns, al cjaparà vinars ai 10 di Otubar in Spagne il premi onorari pe promozion dal cine “western” te suaze de uniche rassegne tal Mont dedicade a chest gjenar, “Almería Western Film Festival”. Il ricognossiment ae cariere e aes ricercjis di Gabescek, membri dal comitât sientific de Cineteche dal Friûl e autôr di uns cincuante libris, al è considerât il plui grant e impuartant espert di cine western al dì di vuê, soredut pes sôs ricercjis ator dal cine di gjenar no dome american, ma ancje chel zirât in Italie e in Spagne. Il premi al sarà consegnât intun parc tematic dongje Tabernas, propit in Almeria: alì il regjist Sergio Leone al à zirât i siei cinc cines western jentrâts te storie! (A.I.) – 09.10.2025