Un etar di pasc al à cjapât fûc îr dopodimisdì a Fusee, a nord di Tumieç, inte localitât Fornas.
Lis flamis a son stadis studadis in gracie dal intervent dai pompîrs di Tumieç e Çurçuvint, che a àn lavorât adun cui oms dal Cuarp forestâl regjonâl di Pontebe, Tumieç e Mueç, che cumò a stan investigant la cause dal incendi. Par fortune no son stadis segnalâts ferîts o dams a cjasis.
Ancje un elicotar regjonâl de Protezion Civîl al è stât mandât fûr par contignî e studâ lis flamis, molant jù aghe te zone dal fûc, daspò vêle supade de cistierne a pueste dal bosc di Buttee. Intai dîs dopo dai doi grancj fûcs che a vevin batûts lis stessis zonis tal principi di Zenâr, la cistierne e jere stade jemplade dai pompîrs di Çurçuvint. (a.d.g.) – 19.01.2026
