La ARLeF – Agjenzie regjonâl pe lenghe furlane e comuniche lis gnovis sessions di esam pe certificazion de cognossince de lenghe furlane, cun provis pai nivei B e C1 dal Cuadri comun european di riferiment pe cognossince des lenghis (QCER).
Lis iscrizions a son viertis fin ai 9 di Novembar dal 2026.
Tal detai, l’esam pal nivel B si fasarà martars il 1n di Dicembar dal 2026, invezit chel pal nivel C1 al è fissât par martars ai 2 di Fevrâr dal 2027. Dutis dôs lis provis si fasaran te sede de Universitât dal Friûl.
“La certificazion linguistiche e rapresente un tassel impuartant par alçâ il status de lenghe furlane e par valorizâ lis competencis di chei che le fevelin. Cun chestis gnovis sessions di esam, o lin indenant cul nestri impegn par ufrîur ai citadins un imprest concret par valorizâlis ancje tal ambit professionâl, cun particolâr riferiment ai setôrs aministratîf e educatîf”, al declare Eros Cisilino, president de ARLeF.
Par ogni nivel, a son previodudis 4 provis: comprension de lenghe orâl, comprension de lenghe scrite, espression de lenghe scrite e espression de lenghe orâl.
Sul sît de ARLeF, te sezion dedicade, a son a disposizion simulazions di provis dai varis nivei e materiâi utii par preparâsi al esam. Te stesse pagjine al è disponibil il link pal test di autovalutazion fat de Universitât dal Friûl par orientâsi tal sielzi la prove plui juste pal propri nivel di competence.
Par partecipâ bisugne jemplâ il modul de domande disponibil sul sît de ARLeF, zontant il curriculum vitae e copie dal document di identitât che al sedi valit.
Par dutis dôs lis provis, bisugne vê finît disevot agns dentri de date di scjadince par presentâ la domande. A saran ametûts massime 30 candidâts par ogni prove, daûr dal ordin cronologjic che a rivin lis domandis presentadis in maniere regolâr.
La domande di iscrizion e varà di sei mandade dentri dai 9 di Novembar dal 2026, dome midiant pueste eletroniche certificade (PEC), ae direzion arlef@certgov.fvg.it.
I tescj integrâi dai avîs, cu la modulistiche e lis indicazions par partecipâ, si puedin lei sul sît www.arlef.it. Par altris informazions, si pues contatâ la ARLeF al numar 0432 555812 o scrivi a: arlef@regione.fvg.it. (a.d.g.) – 13.10.2026
