I students dal Mits Academy Udine a àn vinçût il prin premi inte sezion Its dai campionâts talians di Automation Siemens 2024. Ae edizion di chest an a àn partecipât passe 1.500 students che a rivavin di 17 regjons, cun 79 progjets, ma i students furlans a son stâts i plui brâfs cu la lôr propueste che si clame “Chocopicker”, che e permet il control de cualitât intal setôr de mangjative. Al è un sisteme di vision che al dopre la inteligjence artificiâl, metût parsore di un vecjo robot bon di sielzi la robe e di poiâle jù intal mût miôr. La scuadre de Mits Academy e jere fate di Guadagnini, Zanatta, Abdelsayed, Yacoub, Basello, Milan cui docents Nardin, Bidinost e Masone.
“Al è un risultât une vore bon – e à dit Paola Perabò, presidente de Mits Academy – che al ricognòs lis competencis tecnichis furnidis intai nestris cors di mecatroniche e l’entusiasim, la passion e il spirt di scuadre che al à puartât i fantats a un impegn fûr dal curriculum, ancje in orari di fieste e vie pe gnot”. (a.d.g.) – 06.06.2024
