La citât di Gurize e je al prin puest de classifiche su la cualitât de vite pai zovins, fate dal cuotidian Il Sole 24 Ore, rivant cussì a ripeti il sucès dal an passât. Intes valutazions fatis dal gjornâl economic, il cjâf lûc dal Lusinç al salte fûr pal numar alt di locâi e di chei che a organizin events Siae in rapuart ai zovins residents e pal lavôr a timp indeterminât (in graciis dal numar alt di trasformazions dai contrats che a passin da determinât a indeterminât)e si cjate al secont puest daûr di Cagliari se si fevele di citâts indulà che si organizin spetacui.
Ancje il fat che la etât medie des feminis che a fasin pe prime volte un frut e je tra lis plui bassis (31,6 agns a pet de medie nazionâl che e je dal 32,6) e à judât Gurize in cheste classifiche.
Se si fevele di chês altris capitâls di provincie, Triest e je al cuart puest, Pordenon vicjesime e Udin dome cuarantesime cuarte. (a.d.g.) – 26.05.2025
