Daûr des analisis dal Ufici Studis di Confindustria Udine su dâts Prometeia (inzornâts ai 21 di Avrîl dal 2023), si previôt une incressite anuâl in volum dal Pil regjonâl dal 0,8% chest an, 0,4 ponts percentuâi in plui a pet dal senari delineât a Zenâr. Ancje pal 2024 si stime une variazion positive, +0,8%.
La revision al rialç par chest an e je sclaride dal andament miôr des spietis de ativitât intai ultins mês dal 2022 e de prime part dal 2023. Il contest al è miorât gracie ancje a un câl svelt dai presits energjetics, in graciis di un Invier no masse frêt e al compuartament plui atent dai consumadôrs, cun di plui a une diversificazion svelte des furniduris di gas.
La dinamiche dai consums des fameis pal 2023 si stime inferiôr in maniere lizere a chê dal Pil, atestantsi al +0,6%, stant che, dispiet il ralentament de inflazion, il podê di acuist dai consumadôrs, cundut dai intervents dal Guvier, al sarà condizionât ancjemò da presits alts. Inte seconde part dal an e intal cors dal prossim, i consums a varessin di tornâ plui sostignûts (+1,3% la variazion anuâl preseade pal 2024) in graciis dal infuartiment dal redit reâl disponibil.
I invistiments fis sporcs, dopo la prestazion otime dal bieni passât (+19,1% intal 2021 e +6,6% intal 2022) si podaressin espandi dal 1,8% intal 2023 par dopo cuietâsi intal 2024, +0,7%.
Il contribût des esportazions, dopo la cressite fuarte dal 2022 (+9,9% la variazion in volum), al risultarès positîf ancje chest an (+1,6%) e tal prossim (+1,8%).
Par ce che al tocje il marcjât dal lavôr, si previôt che e larà indenant la cressite de ocupazion (za di là des 520mila unitât l’an passât, +2,4% a pet dal 2019, pre Covid).
Il tas di disocupazion, si varès di atestâ al 5% chest an, par calâ ancjemò di plui il prossim (4,8%). (A.D.G.) – 26.04.2023
