“Vôs a Est” al tache dal balon contât di Patui

Al va indevant cun trê gnûfs apontaments “Vôs a Est”: il festival itinerant che cun libris, podcast e peraulis al vûl ampliâ il concet di frontiere, puartantlu dentri di diviers contignidôrs culturâi, imprenditoriâi e sociâi dal teritori. I apontaments, a jentrade libare, a saran ancjemò une volte ospitâts de sale Pierluigi Di Piazza dal parc di S. Svualt, sede de comunitât Nove, che e à colaborât, cu la associazion Bottega errante e la cooperative Itaca, al gnûf cartelon di avigniments. A screâ il mês di Avrîl, miercus ai 2 al sarà Paolo Patui in dialic cun Mauro Daltin par contâ la sô ultime fadie editoriâl: “Contro” (Cuintri), ven a stâi “dîs storiis minimis di sport, contis di vitis segnadis di ambizions, batudis e dignitât”. Po dopo, ai 16 di Avrîl al rivarà Angelo Floramo cu la sô “Storie sentimentâl curte dai Balcans” e ai 30 Erika Adami cun “Feminis furlanis fuartis”. (A.I.) – 31.03.2025