Une opare di art a Udin cuintri la violence su lis feminis

Si podarà visitâ fint a domenie ai 12 intal cûr di Udin – la centrâl place Libertât sot dal Cjistiel – la instalazion dal artist e ativist Gianluca Costantini, “Ci sono amori senza paradiso” (A son amôrs cence paradîs), une “Spoon river” artistiche dedicade aes vitimis di feminicidi in Italie: 120 intal 2023 e za 60 dome intai prins trê mês dal 2024. Progjetade dal architet Alberto Cervesato, cuntun diametri di 20 metris, la struture e ten dentri i ritrats di cetantis feminis che a àn fat in maniere dolorose fevelâ di se, vitimis che in tancj câs noaltris no si visìn plui nancje che il non. Traviers cheste e altris iniziativis, il festival “vicino/lontano” si zonte ae campagne nazionâl di Rai Radio1 cuintri la violence su lis feminis. (A.I.) – 08.05.2024