Un laboratori par rifleti su lis gjenerazions

La scolte e la analisi de atualitât che o sin daûr a vivi a son al centri dal gnûf cicli di apontaments ator de societât promovût dal Teatri “Verdi” di Pordenon. “R_Evolution LAB”, ideis e dialics su la societât, al puarte al centri une schirie di moments par rifleti su lis gjenerazions diferentis cul jutori di esperts de culture e no dome. A confrontâsi sul palc a saran simpri personalitâts di nivel, che a savaran dâ alc di gnûf, personâl e diferent ator dal teme che al sarà il fîl dal discors di cheste edizion de rassegne. A vierzi la rassegne miercus ai 12 une innomenade femine de television taliane, Serena Dandini. Ai 2 di Avrîl al rive il gjornalist Beppe Severgnini par fevelâ cun ironie dai “gnûfs zovins”, ven a stâi i “boomers” che a cirin… di restâ zovins! Ai 9 di Mai, si siere cul scritôr e regjist Walter Veltroni. Ducj i incuintris a saran vuidâts di Marianna Aprile, gjornaliste e scritore, autore di un libri sui rapuarts complicâts des feminis cu la politiche in Italie. (A.I.) – 11.03.2025