Udin: la lungje spiete de ‘gnot dai letôrs’

La nestre regjon e je une di chês là che la int e lei di plui e tai ultins agns a Udin al è cressût ancje il numar di chei che a van in biblioteche e no dome a comprâ tes librariis. Al è ancje par chel che di dodis agns e va indevant cun simpri plui sucès une rassegne che si clame “la gnot dai letôrs”, ma che vie pal timp si è slargjade a ben plui di une gnot o un dì. Chest an la rassegne e sarà dai 4 ai 8 di Jugn, ma in spiete di chei cinc dîs, a saran passe cent events dai 28 di Avrîl e par dut il mês di Mai pe anteprime “Aspettando… La notte dei lettori”. La diretore artistiche Martina Delpiccolo e à sielt il teme dal an, “GenerAzioni”, cun plui di un significât, ma tacant dal cambiament gjenerazionâl che al côr simpri plui svelt e che al oblee ducj a movisi, capî, decidi, vê un dialic cui altris… Il Comun di Udin al à tirât dentri ben trente comuns pe decime seconde edizion de ‘anteprime’. Il calendari al previôt apontaments ogni dì in bibliotechis, librariis, vilis, borcs, cjistiei, museus, zardins: incuintris, laboratoris, cjaminadis, presentazions, leturis, zûcs, spetacui, mostris e riflessions, tacant propit des pagjinis dai libris. La scree e je in program lunis ai 28 te Biblioteche “Joppi” cuntune cunvigne su lis gjenerazions dai letôrs par cure de AIB – Associazion taliane bibliotechis dal F-Vj. (A.I.) – 28.04.2025