Udin capitâl de informazion cuintri lis bufulis

E tache joibe ai 13 a Udin la cuarte edizion dal “Fake News Festival”, la rassegne des gnovis che a son… bufulis, l’unic event dal gjenar in Italie dedicât ae informazion false e al pinsîr critic, Fint a domenie ai 16, passe 70 ospits e uns vincj apontaments a saran fats tal centri de citât par fevelâ di atualitât, gjornalisim, educazion, gnovis, tecnologjiis… Inmaneât de associazion Prisma, il festival si propon tant che un spazi di incuintri par gjornaliscj, psicolics, ativiscj e studiôs par imparâ a lei il Mont une vore complicât dal dì di vuê doprant la critiche. Il prin apontament de prime zornade – ducj a son a jentrade libar e– al tache aes 8 di buinore tal bar Adoro Caffè di place Venerio cu la rassegne stampe cuasi di ridi di chei di “Lercio”, mestris de satire in rêt. Po dopo, incuintris, presentazions, visitis vuidadis e cetant altri par altris trê dîs. (A.I.) 12.11.2025