Art, contaminazion, talent, pluralisim linguistic, creativitât: Suns Europe al sarà, inmò une volte, dut chest! Il festival des arts in lenghe minorizade – inmaneât de cooperative Informazione Friulana – al è pront par tornâ a puartâ in Friûl musiche, cine, teatri e leterature declinâts intes lenghis minoritariis dal Continent Vieri. La rassegne e tacarà ai 30 di Jugn, par sierâsi ai 26 di Novembar: la otave edizion e sarà duncje un miscliç daûr dal formât de manifestazion dai prins agns. Ancje chest an, il Festival si davuelzarà in diviers puescj, cjapant dentri vot Comuns dal Friûl par undis events (che a deventaran inmò di plui cu la sezion de Sierade!). Par cumò, i ospits a saran plui di trente! Puartant indenant la sô mission – ‘Dirit ae lenghe, dirit ae diversitât’, Suns Europe chest an si vierzarà intal cûr di Udin, in place Libertât cuntun conciert dedeât, dal titul “Suns Friûl”, par cure dal furlan Loris Vescovo, a tacâ des 9 sot sere. (A.I.) – 23.06.22
175
