Storiis, savôrs, lûcs e lidrîs a Tarvis

Musiche sot lis stelis, tal bosc, tes glesiis e te mont cuntune rassegne dentri de anime plui fonde dal paisaç di Tarvis e dulintor. Si clame “Radici”, lidrîs, la rassegne inmaneade pe seconde volte dal comun di Tarvis jenfri storiis antighis, savôrs e lûcs che a fevelin drets al cûr. Cuasi cuarante i events che si puedin vivi di Lui fint a Setembar, a jentrade libare cence sore nuie ma cuntun numar limitât, si che duncje bisugne notâsi par cjapâ il puest. I prins events -mostris, incuintris… – a tachin tal fin de setemane e po dopo, in Avost, si fasaran lis cjaminadis e lis escursions par cirî lis olmis dal savê di une volte, ma a saran ancje siet concierts che a invidin a discuvierzi i ritmis de nature midiant la culture. Vinars ai 18 si scomence a Cjamparòs cul conciert di cjants spirituâls e popolârs carinzians “Dove cielo e terra si toccano” dal cuartet MundArt te glesie di Sante Dorotee, e po dopo une visite ai afrescs. Doi dîs dopo, intune altre glesie al sune Guglielmo Pellarin, prin cuar de Academie romane di Santa Cecilia, e in Avost pe prime volte in Italie la corâl feminine Wiener Chormädchen e altris apontaments. (A.I.) – 17.07.2027