Premiâts i ‘conseis’ dai students

Al teatri comunâl di Monfalcon a son stâts premiâts i 25 vincidôrs dal concors regjonâl “Un libro da consigliare”, inmaneât inte suaze di LeggiAMO 0-18, il progjet di promozion de leture de Regjon. La decime seste edizion de rassegne, che e invide i fantats dai 11 ai 18 agns a conseâ ai lôr coetanis un libri traviers un teme creatîf, e à viodût la partecipazion di une vore di fantats e fantatis des scuelis secondariis di prin e secont grât de regjon. I 25 premiâts (6 pe provincie di Pordenon, 8 par chê di Gurize, 4 par Udin e 7 par Triest), sielts di cuatri juriis di letôrs zovins, a spaziin intes formis e intai lengaçs dal dissen ae fotografie, de poesie ae video conte, fin aes recensions scritis plui tradizionâls. (A.I.) – 05.06.2023