“Pordenonelegge”, un belanç in incressite

La citât dai libris e à batût ducj i record. “Pordenonelegge” e à passât il numar di16 mil partecipants dal an passât e e je za daûr a cjalâ indenant pal event di trê dîs a Praghe, dulà che e si sierarà in mût uficiâl la vincjesime setim edizion de Fieste dai Libris e de Libertât. Dut chest, daspò dal event finâl di domenie sot sere tal Teatri Verdi: il discors dal President de Republiche taliane, Sergio Mattarella. “Cheste e je stade une edizion dulà che e je stade fate la storie: di Vera Politkovaskaya al ex Prin Ministri francês Manuel Valls, fint al scritôr Salman Rushdie -al marche cun braùre Michelangelo Agrusti, il president da Fondazion Pordenonelegge.it – che al à ancje vierzût la strade par Pordenon capitâl de culture taliane tal 2027.” La citât e je stade dute plene di int fin dal prin dì dal festival e i spazis si son jemplâts simpri cun 447 inmaneâts e 694 partecipants. Un numar ancjemò plui alt de edizion dal 2025. Cun di plui, a son stadis presentadis al festival sessante anteprimis di libris dai autôrs e de bande de lôr cjasis editoriis, intun program selezionât dal diretôr artistic Gian Mario Villalta, adun cun Alberto Garlini e Valentina Gasparet. I compliments a ducj a son rivâts ancje de diretore de Fondazion, Michela Zin: “Une machine organizative ben colaudade, buine di consolidâsi di un an a chel altri. E cuntun grup che al lavore ben ancje in gracie dai 263 ‘agnui’ – 182 zovinis e 81 zovins – che a àn fat de eficience e de ospitalitât il segn dal festival e de citât.” E no je finide achì, parcè che il program de Sierade clamât “Fuoricittà” al è za pront par scomençâ in 13 lûcs di dute la provincie: un event pensât ancje e soredut pes scuelis dal teritori. (A.I.) – 21.09.2026