Pieri Maieron, di Paluce a Dachau

Al veve 17 agns tal 1944 cuant che al fo cjapât a Paluce dai todescs e depuartât tal cjamp di concentrament di Dachau cul pari Basilio. Fondadôr de sezion di Pordenon de ANED, la associazion nazionâl dai ex depuartâts tai cjamps dai naziscj, Piero Maieron al fo president fint ae muart tal 2000. Dome tal 1978, cuant che so fi al veve propit 17 agns, compagn di lui tal ’44, al à decidût di lassâ lis memoriis di ce che che al veve vivût in chel an a Dachau, tasudis fint a chel moment. La racuelte dal memoriâl fate dal fi Roberto di chei dîs, cuant che “o vevin di deventâ piere par restâ vîfs”, e il dûl pe muart dal pari Basilio a Dachau al jere stât platât de rassegnazion, e je deventade un libri, jessût par Nuovadimensione: “I miei giorni a Dachau”. Sottitulât “Untermenschen, i sotto-uomini”, curât di Marco Coslovich, espert di storie contemporanie, cun prefazion e introduzion dai fîs Roberto e Alessandra Maieron, il libri al à in zonte ancje la liste complete di ducj i passe 300 depuartâts de regjon, partîts tal 1944 di Triest par Dachau. Martars ai 27 di Zenâr aes 10 di buinore la prime presentazion a S. Vît dal Tiliment tal teatri “Arrigoni”, sabide ai 31 a Paluce tal palaç dal comun aes 5 e mieze di dopomisdì. (A.I.) – 26.01.2026