Passe 200 events pe “Setemane de culture furlane”

Un program une vore siôr, che al cjape dentri passe dusinte events, pe edizion numar undis de “Setemane de culture furlane”, la rassegne di iniziativis culturâls inmaneade de Societât Filologjiche Furlane, che chest an e je rivade ae edizion numar 11 e che si davuelzarà dai 9 ai 19 di Mai. Di fat a son passe 70 i Comuns che a colaborin, 15 lis scuelis e i istitûts comprensîfs, 180 lis associazions, i centris culturâi, i museus e ecomuseus, lis parochiis, lis pro loco, i grups corâi e lis compagniis teatrâls. Joibe ai 9 si tache cu la presentazion dal documentari “Territorio e folclore” e l’omaç a Michele Gortani, il gjeolic umanist, cuntun video par cure di Mattia e Paolo Comuzzi, inmaneât pai 60 agns dal Museu “Gortani” di Tumieç. No mancjarà une riflession su lis personalitâts dal passât e il lôr contribût a pro dal Friûl: chest an si memorein Gianni Borghesan, il filosof Sergio Sarti, l’archeolic Amelio Tagliaferri, il dramaturc Luigi Candoni, la imprenditore Cecilia Danieli, Adriano Degano e altris benemerits. (A.I.) – 08.05.2024