La gnot dai letôrs: 80 incuintris di une gjenerazion a chê altre

Daspò di une anteprime ator pal teritori in trente comuns, cuntun centenâr di incuintris, il festival leterari “La notte dei lettori” (la gnot dai letôrs), une fieste di ducj e di dutis, inmaneade dal Comun di Udin al rive in citât pe decime seconde edizion, simpri cu la direzion artistiche di Martina Delpiccolo. Il teme di cheste edizion, za metût in cantîr l’an passât, al è “GenerAzioni” e al fevele des gjenerazions diferentis e di cemût che si pues impegnâsi par lassâ un Mont miôr di chel che o vin cjatât! In placis, corts, bibliotechis, librariis, museus, teatris, glesiis, parcs.. al sarà pussibil metisi in scolte di gjenerazions che si contin e che si cjatin doprant la leture, la art, la musiche, il teatri, il zûc, la filosofie, il cine, la storie e lis storiis. Dai 4 ai 8 di Jugn (une zornade di plui a pet dal an passât) a son in program passe 80 incuintris (dongje dai 100 za fats) cun cetancj ospits. Dome cualchi non: Beppe Severgnini, Rosi Braidotti, Moni Ovadia, Manuel Bortuzzo, Linda Pocher, Cecilia Pellizzari, Pietro Morello, Freevoices, Andrea Maggi, Enrico Galiano, Antonella Sbuelz, Angelo Floramo, Francesco Caringella, Fabio Ciconte, Riccardo Pedicone e cetancj altris. (A.I.) – 03.06.2025