William Cisilino, diretôr de Agjenzie regjonâl pe lenghe furlane (Arlef), al è stât premiât a Encamp, in Andorra, te suaze dal 34^ Premi internazionâl Ramon Llull, inte sezion Catalanistiche e Diversitât culturâl. SI trate di un ricognossiment prestigjôs che al rive pal siei impegns inte tutele des lenghis minoritariis, tant di deventâ il secont talian inte storie dal premi a cjapâ cheste onorificence.
La jurie dal Premi Ramon Llull e à ricognossût il lavôr fat di Cisilino tal valorizâ lis lenghis minoritariis in Europe e in Italie, sotlineant ancje il so impegn inte promozion de culture catalane. La sô ativitât internazionâl, tra chê ancje il rûl tant che vicepresident de Npld – Rêt europeane pes minorancis linguistichis che e à sede a Bruxelles – che al à permetût di creâ rêts di colaborazion tra ents e istituzions di Paîs diferents, favorint scambis culturâi e progjets concrets pe protezion de diversitât linguistiche.
“Promovi lis lenghis minoritariis nol vûl dî dome prudelâ lis tradizions locâls – al à dit Xavier Espot, Prin ministri dal Guvier di Andorra intervignût dilunc de cerimonie – ma al ricognòs la ricjece culturâl che ogni comunitât e puarte tal mont”.
Il ricognossiment dât a Cisilino al testemonee ancje la impuartance de tutele des lenghis minoritariis e al rinfuarce il rûl dal Friûl tal panorame european des culturis linguistichis. Dongje di Cisilino a jerin presints ae cerimonie tant che premiâts la Fondazion Roser Bru, la tradutore Tiziana Camerani e la filolighe Maria Khatziemmanuïl. (a.d.g.) – 17.12.2025
