Glemone in onôr dai alpins dal ‘76

Sui rudinaçs dal taramot dal 1976 si è consolidât il leam storic tra i furlans e i alpins. Propit chest al è il fîl condutôr de mostre inmaneade dal Comun di Glemone intes salis dal cjistiel, par onorâ i alpins in armis e in congjêt che si son impegnâts fin des primis oris dal disastri. L’Esercit talian al à viert i propris archivis, metint a disposizion un grum di materiâl inedit: musis e testemoneancis di oms in armis, ma ancje di tancj volontaris de Ana, che a àn sgjavât tra i rudinaçs, puartant i prins socors e dant sperance a un teritori plet de tragjedie. Traviers un percors fotografic progjetât di Nicola Pravisani e contât di Giacomina Pellizzari, il visitadôr al jentre inte tragjedie che i alpins a àn rispuindût daurman, cundut che ancje lôr a contassin lis vitimis li de caserme “Goi-Pantanali” di Glemone. (A.I.) – 10.05.2023