Croniche dal rapuart di Ungaretti cun Triest

Ungaretti e Triest: la storie, anzit, la croniche di un rapuart jenfri un poete e une citât, e je al centri di une mostre che si scree sabide ai 27 te biblioteche Stelio Crise di Trieste. “Trieste, invenzione della mia anima”, dedicade ae croniche dal incuintri, e je inmaneade te suaze des Zornadis europeanis dal patrimoni, ma e sarà vierte fint ai 6 di Fevrâr. Il titul al à chel di un libri mai fat, che Vanni Scheiwiller al veve pensât par contâ il viaç a Triest di Ungaretti tal 1968. Il rapuart nol scomence li, ma si podarès confrontâ cun chel dal poete cul Cjars e la memorie de vuere. (A.I.) – 25.09.2025