Contis di furlans finîts intai lagers

Joibe al prin di Fevrâr, aes 8.30 sot sere li dal circul Arci Nuovi quartieri di Udin, ai Riçs, il storic Luciano Patat al tignarà la conference “I treni per i lager. La deportazione dalle carceri di Udine e di Pordenone” (I trens pai lagers. La deportazion des presons di Udin e di Pordenon). In anteprime, al presentarà il so gnûf lavôr di ricercje storiche che al sarà publicât te Vierte, metût dongje dal saç là che al à analizât la deportazion de preson di Gurize. La serade e metarà in mostre la vicende di oms e feminis che a son stâts arestâts tant che nemîs dal Reich intai vincj mês dal Setembar dal 1943 al Avrîl dal 1945 e po dopo puartâts cui trens intai cjamps di concentrament, di stermini o ai lavôrs sfuarçâts. Patat al va insot de dimension umane traviers lis testemoneancis che a ripassin i viaçs dai depuartâts e lis esperiencis brutâls vivudis intai lagers. (A.I.) – 31.01.2024