Buri si prepare a fevelâ dal sec

Culture, art e divulgazion sientifiche intal segn de sostignibilitât a saran ancjemò al centri de edizion che e ven di “TreeArt Festival”, in program dai 13 e ai 16 di Lui a Buri, intal parc di Villa di Toppo Florio. Il teme al è stât pandût propit in ocasion de Zornade mondiâl de Aghe, fissade des Nazions Unidis pai 22 di Març. E sarà une des tematichis di atualitât dal nestri timp: la disponibilitât di aghe intal planet, tacant de analisi di ce che al sucêt ancje tai nestris teritoris par vie dai cambiaments climatics. Il titul di cheste cuarte edizion, che e viodarà presints climatolics, divulgadôrs, sienziâts e esperts, al è propit “Sec”. (A.I.) – 22.03.2023