Avostanis: spetacui e riflessions par là “oltris”

Une peraule che no je, cuasi ‘fantasime’. Un averbi plurâl che no si cjate tai dizionaris, ma al vîf te lenghe di une piçule comunitât cjargnele, che e à nomenât il borc antîc “di là” dal Lumiei “Oltris”: pal scritôr Tito Maniacco, il plui biel paîs dal mont”. “Oltris” al è il teme de gnove edizion di “Avostanis”, la rassegne di mieç Istât li dai Colonos a Vilecjaze di Listize, che daspò di une anteprime e propon spetacui e riflessions, art e pinsîrs, teatri e musiche dal curtîl de cjase coloniche che di passe trente agns e stice la culture furlane a lâ di là dai confins, a sustâ la urgjence di cambiâ dut se al è pussibil, a esplorâ gnûfs orizonts parcè che il presint nol baste, ma bisugne cirì ancjemò une volte resistence e utopie, libertât e trassendence. Martars ai 29, i spetacui – che a van indevant fint ai prins di Setembar – a tachin cul conciert dai RadioZastava, un coletîf unic tal senari dai grups europeans di ispirazion etno balcaniche, che al à spartît il palc cun grancj nons internazionâi e che al fevele de citât là che il grup al à tacât: “Viers Gurize e la Europe”. Ai 2 di Avost, la “Cjantade pal Cid”, un grant mosaic di libertât cu lis fotos di Danilo De Marco, lis musichis di Nicoletta Taricani, lis peraulis di Angelo Floramo e Massimo Somaglino e cetancj altris protagoniscj. Tal stes dî, la scree de mostre coletive di art cul stes titul dal festival: “Oltris”. (A.I.) – 28.07.2025