Dopo dal grant sucès dal an passât, cuant che a son stâts i protagoniscj di “Una splendida favella”, domenie ai 11 di Mai, aes 11, te Tor di Sante Marie (vie Zanon, 24), Flavio Santi e William Cisilino a tornaran cuntun gnûf event par cure de ARLeF – Agjenzie regjonâl pe lenghe furlane, inte suaze di Vicino/lontano, l’impuartant festival culturâl che la Agjenzie e colabore di tancj agns. Chest an il teme de performance a dôs vôs fra il scritôr, docent te Universitât de Insubrie, e il diretôr de ARLeF, a saran doi “Friulani visionari: Raimondo D’Aronco e Giuseppe Marchetti”.
Doi oms, doi idealiscj, nassûts in Friûl in moments storics diferents, che a àn savût dâ forme e insiorâ la culture dal lôr timp e la nestre. Ognidun intal so setôr. Raimondo D’Aronco, nassût a Glemone intal 1857, al à segnât in maniere profonde la architeture europeane e otomane. Rivât a Istanbul, al à savût cumbinâ il Liberty ocidentâl cul gust decoratîf orientâl, creant un stîl unic e facil di cognossi, tant che un altri innomenât architet, Marcello Piacentini, lu à descrit come “un artist che al cîr simpri di rinovâ” e che il Comun di Udin i à volût dedicâ propit la sô sede municipâl. “D’Aronco – un dai architets plui impuartants dal Liberty in Italie e in Europe – al à lassât un segn une vore profont intune des citâts plui bielis dal mont. Rivât te capitâl otomane, al è deventât l’architet dal sultan. Ma inmò prin – al à volût precisâ Santi – al veve za lassât tal so Friûl une ereditât architetoniche che o impararìn a scuvierzi. Te stesse maniere o cognossarìn un om plen di snait e ecletic che o ai volût sielzi ancje tant che protagonist dal gno ultin romanç”.
Si fevelarà ancje di chel che al è calcolât tant che il “pari” de lenghe furlane moderne, Josef Marchet, che cun D’Aronco al veve in comun il lûc di nassite (a 45 agns di distance): Glemone. Di lui Pier Paolo Pasolini al à scrit: “Al è l’unic letôr che o ai in Friûl”. Storic, leterât, studiôs di art, insegnant, predi, Marchet si lu ricuarde pal so impegn, rigorôs e passionât, in tancj cjamps, de linguistiche ae leterature, dal gjornalisim ae storie de art e ae storiografie in gjenerâl. «Marchet al è stât il plui grant inteletuâl furlan dal ‘900 e nus à lassât une ereditât sientifiche e morâl che e scugnarès tornâ tal cûr dal Friûl – al à ricuardât Cisilino -. Parcè che, come che al à vût scrit, la storie furlane no je fate di erois solitaris, ma di comunitâts che a son buinis di cognossi cui che al à cjaminât indenant. Al è timp di fâlu ancje cun lui”. (a.d.g.) – 07.05.2025
