A Davâr si presente il progjet “d@rts” par une altre Cjargne

Di cualchi mês, la Cjargne e je al centri di un studi internazionâl che al vûl valutâ cemût che lis arts dal spetacul – la musiche, il teatri e la danze – a puedin disvilupâ l’alfabetisim culturâl, promovint la cognossince, la inclusion e la coesion sociâl. Il progjet “d@rts – dialoguing arts”, arts in dialic, al vûl cjatâ rispuestis a diviersis domandis, ativant seminaris e programs artistics dentri des comunitâts in Italie, Serbie, Gjermanie e Norvegje. Domenie al prin di Març, un grant event itinerant viert a ducj e sore nuie al darà la pussibilitât di viodi i risultâts dal progjet, promovût de cooperative Puntozero. La zornade e sarà dividude in trê sezions in ancjetancj lûcs tal comun di Davâr, scomençant aes dîs di buinore e sierant cuntune grande fieste a Spin. (A.I.) – 26.02.2026