A Cjasarse une mape fotografiche des nestris lidrîs contadinis

In onôr ae storie contadine di Cjasarse e di dute la regjon, dai 21 di Avrîl ai 2 di Mai inte sale espositive dal ex Municipi e je inmaneade la mostre fotografiche “Il mont agricul, îr e vuê”, vierte dilunc de Sagre dal vin. A inricjî la esposizion, lis fotos dal grant mestri di Cjasarse, Elio Ciol, e dal udinês Fabrizio Zanfagnini, lis fotos storichis – dai Agns ‘20 dal secul passât fin al dì di vuê – dal archivi dal Circul fotografic f64, chês dal Craf di Spilimberc, de cantine sociâl La Delizia e dal circul culturâl Erasmo di Valvason. Une “mape par imagjins dai nestris ricuarts e des nestris lidrîs contadinis, par capî miôr cui che o sin, di dulà che o vignìn e dulà che o lin”, dividude in diviersis sezions: il paisaç agrari, la cjase contadine, la semine, la racuelte de blave, il cicli de vît… (A.I.) – 19.04.2023