Ultins lavôrs a Gurize e Nova Gorica pe scree de capitâl europeane de culture

da Alessandro Di Giusto

A van indenant i lavôrs in place de Transalpina pe scree de Capitâl europeane de Culture GO! 2025 intitulade “Da stazione a stazione”, il prin event grant dal program che al larà indenant par dut l’an. La zornade de scree, sabide ai 8 di Fevrâr, e sarà dividude in cuatri tocs: si tacarà li de stazion di Gurize cuntun corteu e un event inte Piazza della Vittoria, che di li cun 700 artiscj che a rivin di dutis i dôs lis bandis dal confin, il corteu al larà bande Nova Gorica passant il confin li de Carinarnica par rivâ in place Bevk, indulà che i doi sindics Samo Turel e Rodolfo Ziberna a saludaran il public. Aes cuatri dopomisdì e sarà invezit la part istituzionâl de scree in Piazza della Transalpina, intant che in place Edvard Kardelj al sarà il program artistic. Dopo e sarà fieste in cetantis placis des dôs citâts.

I lavôrs par fâ sù il palc che al ospitarà la cerimonie istituzionâl a varessin di jessi finîts (il filmât che o mostrìn al è stât fat domenie ai 2 di Fevrâr) ancje se al reste ancjemò lavôr di fâ inte place, par cause dal brut timp che al à intardât la preparazion dai plets che (domenie) e jerin plens di aghe e pantan.

Intant l’eurodeputât pordenonês Alessandro Ciriani, di Fratelli d’Italia, al à presentât une interogazion ae Comission europeane indulà che al domande la rimozion de scrite “Tito” fate cun claps che si viôt sul mont Sabotino. “Sul Sabotino – al scrîf Ciriani – di decenis e je la scrite che si viôt une vore ben de Italie. Si trate di une clare celebrazion di Josip Broz Tito, ditatôr comunist responsabil dai maçalizis des Foibis e des persecuzions cuintri miârs di talians tal secont dopovuere. Un simbul che al divît e al ofint, che al da cuintri dai principis di memorie storiche e riconciliazion tra popui promovûts de Union europeane”. (a.d.g.) – 04.02.2025

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Progjet finanziât de ARLeF
Agjenzie Regjonâl pe Lenghe Furlane

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui