Tamponament cun doi ferîts vuê tor des 3 e mieze di dopomisdì in vie IV Novembre a Felet, ae altece dal supermarcjât Friulmarket.
Une Lancia Y, cun dentri une siore e so fi, che e stave lant bande dal centri di Felet, e je stade tamponade di une Volkswagen Passat, par dopo lâ a sbati cuintri dal muret che al è denant de buteghe.
I citadins presints a àn clamât il 112 e sul puest a son rivâts daurman dôs ambulancis, i Vigjii dal fûc e la Polizie locâl di Tavagnà. Lis personis dentri de Lancia Y, che subite dopo dal bot a son ladis fûr di bessolis, a son stadis feridis e puartadis cu lis ambulancis tal ospedâl di Udin, intant che il vuidadôr de Passat, ancje se al jere une vore scaturît pal incident no si è fat nuie e al à rivât a parcâ la machine in bande de strade. (a.d.g.) – 23.03.2026
