Sessantecinc fameis di Udin prontis a stralozâ

A son 65 lis fameis udinesis dal cuartîr di Sant Domeni (Peep Ovest) che intai prossims cinc mês a saran trasferidis des lôr abitazions. Il cuartîr al è cjapât intal progjet di rigjenerazion urbane planificât dal Comun e de Ater midiant 23 milions di euros recuperâts cui fonts dal Pnrr. Dentri di Jugn 2023, i lavôrs a varan di jessi consegnâts aes impresis che a àn vinçût l’apalt, che a varan doi agns e mieç di timp par completâ 111 gnûfs apartaments: ducj cence barieris architetonichis e a alte prestazion energjetiche. Pocjis fameis che a saran trasferidis a àn rinunziât a jentrâ ae fin dai lavôrs: par lôr, a son stadis cjatadis par cumò 23 unitâts abitativis. (A.I.) – 19.07.2022