Corot profont in dute la regjon pe muart dal pilote des Frecce Tricolori, il cjapitani Alessio Ghersi, precipitât inte serade di sabide ai 29 di Avrîl intant che al sorvolave cun Sante Ciccia di Milan, un so parint, la Vâl Tor, inte zone di Lusevare. L’avion, un Pioneer 300 I-8548 de Alpi Aviation, al jere jevât pôc prime di Cjampfuarmit par un zîr turistic.
Il cjapitani Ghersi di Domodossola, 34 agns, al cuvierzeve il rûl di Pony 5 inte formazion acrobatiche. La Aeronautiche Militâr e à decidût di anulâ la manifestazion tradizionâl dal Prin Mai inte base di Rivolt, che e segne la viertidure de stagjon acrobatiche. A ogni nivel, des istituzions ae int comune sui social, al è stât esprimût un sclet displasê pe tragjiche sparide dal militâr e dal so parint. (A.D.G.) – 01.05.2023
