Il plan di rigjenerazion de ex-Dormisch, finanziât dal grup Danieli, presentât a Udin al previôt la realizazion di une gnove sede pal Mits, l’Istitût tecnic superiôr “Gnovis tecnologjiis pal made in Italy” dal Malignani di Udin che al ufrìs un percors bienâl post diplome dividût tra studi in classe, oris in laboratori e periodi di pratiche in aziende.
“Cul recupar dal complès industriâl de ex fabriche di bire Dormisch – al à declarât l’assessôr regjonâl aes Ativitâts produtivis Sergio Emidio Bini – si torne ae citât une aree impuartante. E je la prove che cuant che public e privât a colaborin, si otegnin risultâts impuartants: in graciis di un progjet ambiziôs di rigjenerazion urbane, inte cort di Puarte Vilalte a nassaran grancj spazis pe alte formazion dai nestris zovins. Al è un progjet che al fevele di futûr e di inovazion: la Regjon e pues dome che preseâ cheste iniziative impuartante”. (A.D.G.) – 28.06.2022
