Al è fuart il corot de comunitât di Premariâs pe muart di Gabriele Zentilin, il zovin di 22 agns che îr sore sere, tor lis 9.40, al è lât a sbati cuintri di un arbul cu la sô auto dilunc vie Vittorio Veneto a Tavagnà.
Il zovin al à pierdût il control de sô machine, une Alfa Romeo 159, par dopo lâ a sbati cuintri di un platin, in maniere cussì fuarte che al è muart sul colp. Lis operazions dai Vigjii dal Fûc par tirâ fûr il so cuarp dai lamarins fruçâts a son stadis lungjis e dificilis.
Il cuarp dal zovin al è stât puartât tal obitori di Udin.
Gabriele, che a Premariâs al jere une vore cognossût, al veve fat i agns ai 9 di Dicembar e al lavorave come eletricist intune aziende di Manzan. (a.d.g.) – 03.02.2025