E je stade une vore alte la partecipazion aes manifestazions e ai presidis inmaneâts de Cgil inte zornade dal siopar gjenerâl a pro di Gaza e de Palestine e par protestâ cuintri dal arest dai civîi des barcjis che stavin lant ae volte di Gaza di bande dal esercit israelian.
Lavoradôrs, pensionâts, une vore di students a àn tacât a jemplâ stradis e placis fin des primis oris de matine. A Triest il corteu al è partît di vie Giulia e al è lat in place Oberdan; a Udin al è stât fat il presidi denant de Prefeture, a Pordenon tante int in place XX Settembre intant che a Monfalcon si son cjatâts in place Repubblica, ducj a domandâ di fermâ il maçalizi e vierzi invezit canai par fâ rivâ robe ae int di Gaza.
“Un popul di dutis lis etâts – al à sotlineât Michele Piga, segretari regjonâl de Cgil – metût adun di un fuart sens di solidarietât bande il popul palestinês e par protestâ cuintri de violazion dal dirit internazionâl fat dai militârs israelians che a àn tacat barcjis civîi in aghis internazionâls che a puartavin jutoris ae popolazion plene di fam e che par difindiju il nestri Guvier nol à dite nuie”.
No son mancjadis lis polemichis de bande dai esponents politichis de Drete, a nivel talian e regjonâl. Cussì il ministri pai rapuarts cul Parlament Luca Ciriani che a Vile Manin, dilunc di un event, al à fevelât di “Siopar politic che al à come obietîf chel di da cuintri dal Guvier”, intant che la assessore regjonâl ae Istruzion Alessia Rosolen e à pontât il dêt cuintri de manifestazion fate in place I° Maggio a Udin indulà che a jerin ancje frutins: “O consideri une vore grâf il fat di cjapâ dentri i piçui e fâju deventâ compliçs des provocazions puartadis indenant de Global Sumud Flottilla che inte sô azion e à fat di dut infûr di fa il puartevôs di intenzions di pâs”. (a.d.g.) – 03.10.2025
